الله يعظم أجرنا في فقيدة
مهما بدر منها عفينا وصفحنا
عاشت معانا أيام ما هي مديدة
أيام كنها سنين معنى ومبنى
أيام عدت أشهد انها سعيدة
من بعدها بالحيل زايد وجعنا
القلب نوخته هموم(ن) شديدة
عن كل غالي أبعدتنا و بعدنا
عنود فكري ليه صرتي عنيدة ؟
و جود وجدي الوجد و الله قصمنا
كان المؤمل منك انك سنيدة
ما كنت اظن اني حكاية معنا
يا وردة الجوري علامك مريدة ؟
شوكك لقينا ما لقينا سعدنا
ما ني مصدق ما توفي قصيدة
كل القصايد ما توفي تعبنا
أنا بسيط لكن أفدى عقيدة
عقيدة التوحيد اللي رفعتنا
كل العقول تقول مانتي رشيدة
يا الله بعد الغي نلقى رشدنا
حالي مثل حال اللي ضيع رصيده
بعد التجارة و التعب زاد غبنا
الناس قالت يا بخت من تريده
عني وانا اقول البخت حل عنا
لوحات لوعات الدهر هل تعيده ؟
هيهات وان هون أبقطع حبلنا
لحظة قرينا اسمها بالجريدة
هاضت مشاعر بالبلا غرقتنا
مرضت منها ليه روحي زهيدة ؟
أرخصتها للي بلحظة ازهدتنا
آه(ن) على آه(ن) سنين(ن) عديدة
جريت أنا الآهات من كل فنا
بالليل لي موال وأمي شهيدة
شافت ضناها أضنته كل ونا
الله عسى يصبرك دعاها تعيده
كل ما تصبحنا وكل ما هجعنا
القلب لا منه دفق من يعيده ؟
هول المصيبة يا بشر ما تركنا
أصبر على كل الخطوب العتيدة
أصبر على من زولها غاب منا
في الحلم كل ليلة أشوف البعيدة
يا زين شوف اللي مراحه ذبحنا
يا ليت لي جيش الشريف واعيده
بالغصب والا الطيب باللي تسنا
جرحي عطب بالحيل زايد صديده
من جاحد(ن) باغي ظلمنا وطعنا
ليست هناك تعليقات:
إرسال تعليق
أضف تعليقا !